 |
 |
 |
|
|
|
مسرحية موسى العصرى فى دولة سكسك : الفصل الأول مسرحية شعرية ** الفصل الأول ** ( يفتح الستار عن المملكة – فرعون / هامان / حور / ثور / وعدد من الجنود والطراز فرعونى ) الجنود / ها هو – هو ها – هى هى – ها هو هى فرعون / ها هع الجنود / هع هع فرعون / ها هى – [ كفاية قطعتوا نفسى ] [ محدثاً هامان ] ها يا هامان أين الأخبار ؟ فين تقرير السيه آى إيه فين أخبار الانترنت – كان مكشوف أو كان أسرار هامان / كله تمام فرعون / أنا من يوم ما بقيت فرعون وانت تقوللى كله تمام هامان / آى والله ... كله تمام بره القصر ... الناس آهى ساكتة آكلة وشاربة واللى ما كللشى . . . آهو بينام واللى اتعشى . . . نص و نص يكمل أكله . . . فى الأحلام بره القصر . . . كله تمام كل الناس . . . أهى شايفة وخايفة واللى يفكر يوم يتكلم . . . يلقى لسانه بقدرة قادر .. نص لسان فرعون / "ضاحكاً بهيسترية وعبط " ها ها هو هو هيئ هيئ ....
لا .. لا يا هامان ..... وده يبقى ازاى أبو نص لسان ها ها هو هو هيئ هيئ هامان ضاحكاً / آى والله .... نص لسان " يخفت الضحك شيئاً فشيئاً " بس تصدق فرعون متأملاً / إنى ساعات ... أنا باسأل نفسى ليه حطيت الخوف ... فى بلادى ليه أنا بازرع ... رعب فى شعبى ليه خليت ... الناس بتطاطى ليه حبيت ... الصوت الواطى هامان / لازم رأس الناس ... تنداس فرعون / ليه ..... تنداس هامان / علشان أصل .... الخوف إحساس لازم يسرى .... فى دم الناس فرعون / وإن ما سراش الخوف ... جواهم يحصل إيه هامان مولواً / يييـــــــــه كانوا ياكلونا ..... يا مولانا أصل الناس .... كلها طمعانة كل الناس .... مستنية موتك أقصد يعنى .... الناس عشمانة أقصد يعنى .... أقصد يعنى ........ عندك مثلاً حزب سلامة .... وحزب ندامة وحزب كمان سموه .... المستقبل كله بيرسم .. كله بيحلم .. إنه بيحكم اوعى تفرط .... يا مولانا كرسى الحكم .... معانا أمانة فرعون فى تأمل / أيوه صحيح ..... كل كلامك .... قافية ... صحيح وزن .... ومعنى وبيقنعنا لكن . . . قوللى طيب ليه ... أحزاب ودياولو ليه بنمثل ... على بعضِنا همه أكيد ... فاهمين لعبتنا ليه بنمثل ... على بعضِنا همه أكيد ... فاهممين لعبتنا احنا اخترنا ... طريقنا بإيدنا واللا فيه حد .. وفرضه علينا أنا من رأيى ... بلاش أحزاب ياللا نخلى ... عاليها ... واطيها وآدى فرمان ... تلغى وفوراً ... من دستورنا كلمة حزب ... ومشتقاتها وبلاش دوشة هامان ضاحكاً / وبلاش دوشة .. يا للا نخلى عاليها واطيها وانسى الدنيا ... وريح بالك ... (يغنى) وانسى الناس ... واحنا شعارنا ... إيه يا مولانا فرعون بصوت عالى / آ آ آ ه ... ما علينا ثم بصوت خفيض / يا وش الفقر .. الأزلى حقول ما علينا " الحاجب يدخل مستأذناً للوزير ... حور " " ويكون فرعون فى حالة تقترب من السكر " الحاجب / هى ها هو فرعون مرتعداً / السح الدح امبو ... لا لا ... قصدى ها هى هو الحاجب / وزير الدولة حور مفتاح فرعون / خليه يدخل " يدخل حور بخطوة عسكرية مضحكة " " وعليه ثياب ... ترمز إلى السرية الشديدة " حور / يسمح مولانا الفرعون إنى أقدم خالص حبى
فرعون / يا للا سيدى ... قدم لينا خالص حبك حور / وكمان أقدم خالص ودى ... وخالص شكرى وخالص ........ فرعون مقاطعاً / يييـــه ... بطل بقه حركاتك ديه انت صحيح ... مسؤول الفتنة وكمان خدت التليفزيون بس أنا فاهمك .. وانت فاهمنا قول سمّعنى .. قوللى .. غنى
حور / مرفق طيه يا مولانا خطة إعلامنا ... المحبوكة فيها كلام عن خطة بكره خطة إنما إيه ... مسبوكة بس سؤال ... لو تأذن لى فرعون / خير إن شاء الله حور / انت مُصر تربى فى قصرك ... موسى العصرى فرعون / يييـــه / حنرجع تانى ... للقصة دى أيوه مُصر ... وسبق اتكلمنا فى موضوعه إيه يا سى حور إيه غاوى شر ؟! تحب تشوف الوش التانى ؟! دأنا فرعون صايع ... يا روح أمك .... حور خائفاً / لا ما أقصدش يا مولانا بس أنا شفته ليلة امبارح فى قصر ثقافة ... باب اللوق بيدى محاضرة .. كلام مفتوح وناس حواليه ... بيسأل ويجاوب وابن الإيه ... كان زى اللبلب لا بيتردد ... ولا بيحاسب كل كلامه عن الحرية .. والمساواة ومرة يقولك .. ربنا قال ومرة يقولك دنيا .. وآخره ... هامان يتدخل / تانى عملها ... يا مولانا قوللى عظمتك امتى بقى نسأل ونحاسب فرعون / نسأل مين ونحاسب مين ؟ هامان / اسأل موسى ... وأحاسب موسى اسمع منى يا مولانا احنا فى مركب واحد خادنا بيقضينا ... وعلى قدينا لكن موسى .. ده مش من توبنا ليه ربيته ليه خليته ليه عيشته .. ف داخل بيتنا يشوف أسرارنا ويفهم كل خبايا القصر وكل حيلنا فرعون / حنرجع تانى .. ونحكى القصة قوللى يا دعبس ... مين سماك ... بالإسم هامان هامان / اسمى ده منحة ... من مولانا سيد الناس هامان / من فرعون ... الحاكم الأوحد فرعون / وانت يا تامر .. يا حبيب أمك مين سماك ... اسمك يا سى حور حور / اسمى ده منحة ... من مولانا سيد الناس حور / وأنا سميت نفسى ... فرعون مع إن الشعب فى دولة سكسك يعرف إن اسمى سنكوح وبقيت فرعون مش فرعون .. ولا كمون يعنى أنا كان اسمى سنكوح وبقيت فرعون طيب ليه فرعون ... مش هانى ولا فتوح
أصل عجبنى الواد فرعون خلى نفسه إله الكون وما حدش فى الميت مليون فكر مرة .. يفتح بقه هو ده بقى الحاكم بصحيح فرعون راح ... جه فرعون
هامان / طب كان موسى لزمته إيه فرعون / يا بنى افهمنى لازم كل حاكم فرعون .. يكون له هامان ولازم يركع تحت أقدامه الناس ألوان اللى ينافق ... واللى يقدم خالص وده واللى يسمى نفسه الوطنى واللى يقوله احنا فداك واللى يقولوا ... رجال أعمال واللى بيشفط ... كام مليار واللى يقوله ... معاك فى المحنة واعبر بينا ... ابصر إيه هامان / نرجع تانى بقى مرجوعنا طيب موسى لزمته إيه فرعون / موسى يا دعبس .. هو القصة أنا من السهل علىّ ألاقى فى شعبى ألف هامان وألف هامان ... كثير من رُخصه لكن موسى .. هو القصة علم شعبه .. يعبد ربه وهزم بيهم .. جيش فرعون رغم العز .. بتاع فرعون ورغم الجاه .. وكانت الناس شايفاه كإله لكن موسى .. هزم فرعون آدى يا دعبس ........ أصل القصة موسى الأصلى .. حجة علينا حلم بيحلم بيه الناس لأنه الثابت .. جوه الدين لأنه السارى فى الإحساس موسى يا دعبس هو الفائز .. على فرعون رغم إنه إله زى تمام عمرك شفت إله كان يغرق أو بيصرخ .. زى العيل يبقى إله لو تموتوا يا دعبس نفس ظروفى ... هى ظروف فرعون الأصلى وأنا حبيته ... وحبيت رسمه وأصله ... وفصله لكن موسى موت حاكم كانت الدنيا بتسجد عنده أصله يا دعبس .. علم شعبه يعبد ربه
هامان / نرجع تانى ... بقى مرجوعنا طيب موسى .. لزمته إيه فرعون / المرة دى ... أنا غيرت القصة جبت فى بيتى .. موسى العصرى وانت هامان وده عرشى ... وقصرى وخدمى ... وحشمى وآدى الناس ... شعب عبيد ... بيبوسوا ف رجلى نفس الفكرة ... ونفس القصة بس أنا حاطط خطة جديدة وكل منايا أنى أحطم موسى العصرى هامان / أنا مش فاهم يعنى تربى موسى فى بيتك علشان تهزم موسى الأصلى أنا حاتجنن أنا مش فاهم أنا مش فاهم فرعون / يا بنى اتنور .. يا بنى اتطور وشيل الجزمة .. بقى من مخك لازم احنا نعيد القصة بذات أبطالها وإلا حتبقى حُجة علينا كل ما حاكم يظلم شعبه أو يوم ذله ... عشان مصلحته يطلع موسى .. وينصر شعبه ويفضل أمل النصر .. فى قلبه مهما نعذب .. أو نسجنهم يبقى الواحد فيهم حافى لكن يحلم .. بالحرية وبالرفاهية وبالمساواة وأبصر إيه ... ومدرك إيه طبعاً .. أصل أهو شايف أصل القصة إن الشعب .. هزم فرعون يفضل صابر ... رغم المحنة ... ويفضل فاهم إن إله الكون فى الأرض .. مش فرعون لأ .. قال إيه قال ده إله ... ساكن فى علاه وأنه حيهزم .. ميت فرعون مهما اتقوى بالأسطول أو بجنود الأرض كمان مهما يكون .. مهما يكون هامان / يعنى سيادتك .. كاره موسى فرعون / لا يا حمار موسى ده ابنى أنا ربيته ... وخدته فى حضنى لازم أحبه ... زى القصة لازم أعيدها .. بنفس شروطها ونفس حروفها حتى مراتى ... موسى يمثل .. بالنسبة لها حلم حياتها لكن بعد ما أعيد القصة ... بذات أبطالها لازم اهزم ... موسى العصرى أهزم فكره ... وأهزم أمله واهزم أمل الشعب ... ف بكره لازم أهزم نص القصة ان غلام يتربى فى قصر / ويهزم والده وياخد منه هيبته وشعبه ويهرب كده وف عز الظهر وتنتهى كل القصة بإنه / شاف البحر بيبلع والده ... ويبلع جنده حور / لكن الحاكم يا مولانا ... ولا كان خاله .. ولا كان عمه .. ولا كان والده فرعون / لا يا اخوانا ... مش مضبوط ما دام رباه ... خلاص ده أبوه وعمه وخاله ... وابنه وجده لازم احنا نعيد القصة ونهزم موسى ونهزم فكره ونهزم كل الأمل الساكن جوه النفس .. بتحلم إن النصر ف بكره هامان مخاطباً – حور / فاهم حاجة حور هامساً / يعنى ... طشاش فرعون صارخاً / لما تكون بحضور فرعون موجهاً قوله إلى هامان / يا تعلى صوتك .. ايما بلاش هامان مرتعداً / يعنى باقول مش فاهم حاجة حور فى سرعة / بس أنا فاهم يا مولانا بس طشاش فرعون ضاحكاً / ها هى هو ها هى هو انت هامان زى هامان فى القصة تمام جسم كبير .. والعقل حمار ها هى هو فى القصة يا دعبس قال فرعون لها ما ذات يوم ( ذاتا يوم ) ابنى وعلى ... برج كبير تعرف ليه .... يا غراب الشوم
هامان فى بلاهة / ليه ... هيه ... ليه فرعون / قال فرعون كان عاوز يطلع فوق ... عالى ... فوق قال علشان ما يشوف الله هامان / طب فرعون كان عاوز يطلع فوق عالى عالى ... عند الله مين بقى فيهم يبقى حمار .. ها هوه ها فرعون فى حدة / تقصد إيه هامان فى فزع / لا ما أقصدش وعزة رأسك قاطعاً الضحك فرعون / شوف يا مغفل لما الحاكم يوم يتفرعن ... اوعى تصدق إنه مصدق ... إنه إله جوه ف نفسه .. صوت بيقوله إنت ضعيف يفضل خايف .. مـ المستقبل كل ما واحد جنبه يموت يفضل خايف .. إنه يموت أكثر حاجة تخوف ظالم لحظة خوفه .. من المجهول وقت بييجى .. ووقت يفوت طفل بيصرخ عند ميلاده لحظة صراخ .. والثانية سكوت وجوه فى نفسى .. صوت بيقولى إنت ضعيف شوف يا هامان .. اوعى تصدق إنى مصدق .. إنى إله ( فرعون يفيق ثم يخاطب هامان ) ولكن أهو برضه .. وجودك فايدة أهو بتخلى الأسود .. أبيض وبتوهمنى ... وهم جميل والعاقل يصبح مجنون وتقوينى ف لحظة ضعفى انت ضرورى تعيش يا هامان علشان ابقى صحيح فرعون ( يدخل الحاجب مستأذناً لموسى ) فرعون / جبنا ف سيرة القط خليه يدخل ياللا قوام ( يوجه الكلام إلى هامان ) هامساً شوف يا هامان إزاى تتكلم شوف واتعلم ناخده هو اده .. واحدة بواحدة واحدة بإيه .... ؟ هامان وحور / واحدة بواحدة .. واحدة بواحدة فرعون / أيوه تمام .. واحدة بواحدة ( يدخل موسى وعليه أمارات الدقة وسماحة الطبع وحسن الهندام ) موسى / السلام عليكم ... يا مولانا فرعون / أهلاً .. أهلاً .. فلذة كبدى فرحة عمرى .. روحى وقلبى موسى / أهلاً بيك يا حبيبى يا والدى فرعون / عامل إيه يا ابن الأسياد موسى / أحمد ربى ( فرعون محدثاً نفسه ) تحمد ربك / أول كلمة متطمنش ( ثم يوجه حديثه لموسى ) انت امبارح غبت ما جتش كنت محضر علشان خاطرك حفلة وبارتى رقصت نيللى الرقص الشرقى والبيكادللو غنى إيطالى والإيقاعات كان جيرك وغربى وكمان عربى موسى ضاحكاً / وكمان عربى ؟ !! فرعون ملاطفاً / آى وحياتك ... وكمان عربى واستنيتك وانت ما جتشى موسى متردداً / أصل يا والدى .. أصل يا والدى فرعون / إيه ... يا حبيبى أصل أنا أقدر .... أقرا فى عينك كل كلامك إوعى تخبى موسى / لأ ... مش قصدى بس سيادتك عارف إنى فرعون / إنك إيه موسى / إن الرقص الشرقى .... ونيللى يعنى يا والدى فرعون / لو مش عاجباك نيللى يا ابنى نشوفلك غيرها عندك تحتوحة النحنوحة والرقاصة بتاعة شبرا .. اليهودية بتاعة غنوة .. حلوة يا بلدى فيفى ما نيللى كانت روعة فى عيد الثورة يوم 30 سبتمبر هجرى موسى / لأ يا والدى ... أنا مش قصدى فرعون / موسى ! / فسر يا بنى ياللا وقوللى أنا قربت خلاص أتوغوش انت بتكره سلو بلدنا ؟ موسى / سلو بلدنا مش فى الرقص ومش فى العرى وفن اللالى أفهم إن الفن جمال ... رسم وشعر وسينما ومسرح مش تحتوحة وفيفى ونيللى ممكن يبقى رسالة وقيمة يرفع شعبنا فوق ويعلى فرعون / آه ... اتغيرت أيوه أنا عارفك ... اتغيرت شكلك .. صوتك .. كل كلامك اتغيرت
طب وحكاية سهرك ..... بره فى باب اللوح موسى / انت عرفت ؟! فرعون / طبعاً طبعاً .. خطوة بخطوة فين ما تروح كنت بتدى محاضرة أظن موسى / أيوه يا والدى فرعون / مين كان قاعد ويا جنابك موسى / بعض الشعب ناس من الشعب فرعون / الشعب / ها هى هو ... ها هى هو مين الشعب موسى / ناس بسطاء بيبحبوا الناس من جوه القلب قلب الواحد منهم أبيض زى الماس بياكل حب ... ويشرب حب فرعون بهدوء/ قلَم إيه .... ممكن أعرف ؟ ! موسى / كنا بنتكلم فى النور .... وكمان كان حاضر من القصر حور والثور ... وكمان شهبور وسمعوا كل كلامنا يا والدى .. فرعون / كان عن إيه موسى / كان عن حب الخير للناس إزاى تقدر تسعد أمه ازاى تقدر تمحى الظلمة تنور عقل البشر الضايع تملا كيانه بالإحساس ازاى إنك تصحى تلاقى بكره جميل أو ما بقاش ف بلادنا عليل كله بيشرب – كله بياكل واحد – واحد كله بيعبد ... ربه الواحد فرعون منفعلاً / وقف عندك ده اللى أنا كنت حسبت حسابه مالنا ومال الرب الواحد ثم هادئاً / شوف يا حبيبى .. كل الناس فـ بلاد مملكتى
كل ما واحد يبلغ سنه يشوف له إله اللى بيعبد واحد صاحبه واللى بيعبد رأس المال واللى بيعبد فكره ورأيه واللى بيمشى زى هواه واللى بيعبد شيخ وطريقة واللى بيسجد للأصنام واللى بيعبد بنت يشوفها فى البلكونة واللى بيعبد بقرة وديك أو فرد حمام موسى / وانت يا والدى فرعون / أنا يا حبيبى – نص إله بص النص الثانى كمان ما هواش بشرى لما با قول أو لما اتكلم يكون الحق فى قولى تمام ما تقول يا هامان !!! هامان / طبعاً طبعاً يا مولانا متدخلاً لما الرب اختارك لِنا أنزل عصمته على إنسان لما النهر بيجرى فى أرضك يجرى بأمرك كلنا ملكك – كلنا ملكك موسى متدخلاً / طب والنص الثانى يا والدى هامان مقاطعاً / الإلهــــام أيوه النص الثانى ... عبارة يا سيدى عن الإلهـــام لما كبيرنا بيقعد وحده ... بيسمع صوت مليان أنغام فرعون / أيوه تمام أسمع صوت ... مليان أنغام ... آه .. أى حياه فرعون انغام .. أمال إييه .. صوت انغام هامان / صوت بيقوله يا فرعون ... إنت إله ابن اله وابن ابن إله ويملى له خطاب العرش اللى يقوله فى عيد الثورة أو يكتب له بيان سبتمبر أو يعمل له خطابنا الثورى عهد ما بينه وبين الشعب أو يوحيله بالتصحيح والتعمير والتشجير فرعون نائماً / والتشخيـــر ثم يفيق / أيوه تمام أنا باسمع صوت موسى / بس كفاية كده يا هامان اسمع منى كلامى يا والدى انت يضايقك .. أنى أفكر فرعون / لأ .. لأ .. أبداً .. أبداً موسى / إنت يضايقك إن يكون لى طريقى وفكرى فرعون / لأ .. لأ .. أبداً موسى / يبقى اسمح لى ... انى أخالفك أنا مش حانكر انك والدى صحيح ربتنى وانت اخترت لى اسمى ولبسى وأنا مش اسمى موسى العصرى لكن انت فى نظرى يا والدى نصك بشرى فرعون / طب والنص الثانى يا ابنى موسى / برضك بشرى فرعون / طيب اسمع عندك مانع لو تبارزنى موسى / مش معقول إيه ده يا والدى فرعون / بس استنى ... لو تفهمنى أقصد يعنى جلسة فكر جوه القصر تعرض فكرك ... واعرض فكرى تعرض رايك ... واعرض رأيى واللى يفوز منا على الثانى ... ناخد رأيه ونعمل زيه موسى / بس يا والدى فرعون / ما تترددش ماشى يا والدى ... اللى تشوفه ماشى يا والدى
|
| |||||||||
أضف للمفضلة
اطبع هذه الصفحة
